Փետրվարի 26-ին Հունգարիայի Բալատոնալմադի քաղաքում ստորագրվեց Սևան-Բալատոնալմադի քույր քաղաքներ դառնալու հուշագիրը՝ սկզբնավորելով երկու քաղաքների միջև մշակութային և տնտեսական համագործակցությունը։

Հուշագիրը ստորագրեցին Բալատոնալմադի քաղաքապետ Լասլո Բերչենյին և Գեղարքունիք մարզի Սևան համայնքի ղեկավարի տեղակալ Արման Հարությունյանը։ Հանդիպմանը ներկա էին Հունգարիայում ՀՀ դեսպան Աշոտ Սմբատյանը, Հայ ինքնավարության խոսնակ Նիկողոս Ակոպյանը, Հունգարիայի Հայ ինքնավարության նախագահ Ցարան Իշտվանը, ՀՀ պատվավոր հյուպատոս դոկտոր Ապկարովիչ Գեզան։ Կողմերը քննարկեցին ստորագրված հուշագրի հիման վրա Սևան և Բալատոնալմադի քաղաքների միջև համագործակցության վերաբերյալ հարցերի լայն շրջանակ։

Պատահական չէ, որ հուշագիրը ստորագրվեց հենց այս երկու քաղաքների միջև։ Դեռևս ամիսներ առաջ Հունգարիայում ՀՀ դեսպան Աշոտ Սմբատյանի և Բալատոնալմադի քաղաքապետ Լասլո Բերչեյնիի հանդիպման ընթացքում քննարկվել էին Սևան քաղաքի հետ համագործակցության հաստատման հնարավորությունները՝ հաշվի առնելով երկու քաղաքների աշխարհագրական դիրքը և առանձնահատկությունները: Բալատոնալմադին՝ գտնվելով Բալատոն լճի ափին, իր աշխարհագրական առանձնահատկություններով նման է Սևան քաղաքին, որը նույնպես գտնվում է համանուն լճի ափին։

Այս հուշագրի ստորագրումը նշանակալից դեպք է՝ հանդիսանալով առաջինը Հայաստանի և Հունգարիայի զարգացող հարաբերությունների մեջ։

Հոդվածը՝ Շողեր Մանուկյան,  2024-1-HU01-ESC51-VTJ-000207879

Լուսանկարները հրապարակեց ՝ Շողեր Մանուկյան, 2024-1-HU01-ESC51-VTJ-000207879

Փետրվարի 26-ից մարտի-2-ը Հունգարիայի Դեբրեցեն քաղաքում անցկացվեց Գեղասահքի Պատանեկան Աշխարհի Առաջնությունը, որին ՀՀ-ից մասնակցում էին մարզիկներ Միքայել Սալազարյանը և Սոֆիա Տիտովան՝ մարզիչներ Գեղամ Վարդանյանի, Սերգեյ Ալեքսեևի և խմբի ղեկավար Էլեն Համբարձումյանի գլխավորությամբ։  Գեղասահքի աշխարհի պատանեկան առաջնությունը համարվում է այս մարզաձևի ամենահեղինակավոր մրցաշարերից մեկը, որն ամեն տարի համախմբում է աշխարհի լավագույն երիտասարդ գեղասահորդներին։

Հայ մարզիկները հանդես եկան գերազանց ելույթներով կարճ և ազատ ծրագրերում ՝ ցուցադրելով բարձր տեխնիկական պատրաստվածություն։ Նրանց հաջողված ելույթները ևս մեկ անգամ ընդգծեցին ՀՀ-ի աճող ներգրավվածությունը ձմեռային մարզաձևերում։

Պատանի մարզիկներին աջակցելու նպատակով Հունգարիայում ՀՀ դեսպան Աշոտ Սմբատյանը այցելեց Դեբրեցեն և ներկա գտնվեց առաջնությանը։ Մրցումներից հետո նա հանդիպեց հայ գեղասահորդներին և մարզչական թիմին՝ մաղթելով նրանց նորանոր հաղթանակներ ու հաջողություններ՝ Հայաստանը միջազգային մարզական հարթակներում պատվով ներկայացման գործում։

Հոդվածը՝ Շողեր Մանուկյան,  2024-1-HU01-ESC51-VTJ-000207879

Լուսանկարները հրապարակեց ՝ Շողեր Մանուկյան, 2024-1-HU01-ESC51-VTJ-000207879

Փետրվարի 2-ին, Բուդապեշտի հայկական կաթոլիկ եկեղեցում, հայկական համայնքը տոնեց Տրդնեզը (Տյառնընդառաջը)։ Տոնական օրը սկսվեց կիրակնօրյա պատարագով, որի ընթացքում ընդգծվեց Տրնդեզի հոգևոր նշանակությունը։ Այնուհետև եկեղեցու բակում վառվեց ավանդական խարույկը, որի շուրջ ՝ «Հավք» պարային խմբի կատարմամբ երգերի և պարերի ներքո, շարունակվեց տոնակատարությունը։ Այնուհետ եկեղեցու ներսում փոքրիկ հյուրասիրություն եղավ, որտեղ մատուցվեց նաև ավադական աղանձ։

Տրնդեզի արմատները հասնում են նախաքրիստոնեական ժամանակաշրջան, երբ այն կապված էր կրակի աստված Վահագնի մասին առասպելի հետ, ում շնորհիվ ձմեռը «պարտվում է», և գալիս է գարունը։ Քրիստոնեությունը ընդունելուց հետո այն կապվեց Քրիստոսի ընծայման հետ և մինչ օրս մնում է սիրված ու պահպանված ավանդույթ ` խորհրդանշելով ընտանիքի և սիրահար զույգերի օրհնությունը և գարնանամուտը։

Հոդվածը՝ Շողեր Մանուկյան,  2024-1-HU01-ESC51-VTJ-000207879

Լուսանկարները հրապարակեց ՝ Շողեր Մանուկյան, 2024-1-HU01-ESC51-VTJ-000207879